Пиперката сака лук и кромид во близина, може да поднесе домати, но има проблеми со мешунките, тиквите… Што друго и одговара, а што не на овој често одгледуван зеленчук?
Пиперката е кралица меѓу зеленчукот кога станува збор за потреби и услови за одгледување. Таа е чувствителна на растенија кои растат во нејзина близина. Бидејќи често го одгледуваме, со изборот на добар сосед можеме да се погрижиме да имаме здрави растенија кои носат добар принос, а во исто време да одгледуваме повеќе видови. Растенијата се штитат едни со други од болести и штетници, го подобруваат растот и развојот, го зголемуваат имунитетот и вкусот на плодовите.
Добри соседи, здрави растенија
Со избирање на соседи, практично управуваме со ритамот на раст и развој, спречувајќи појава на инфекции. Поради оваа причина, идеални се оние видови кои лачат активни супстанции со поволен ефект врз родот на пиперката, бидејќи можат да го инхибираат растот на патогени организми и да ги одвратат штетниците со својот мирис. Први на таа листа се лукот и црвениот кромид. Покрај тоа што се добри соседи, овие култури се одлични за подготовка на раствори кои делуваат како заштитни средства и биостимулатори.
Искусните градинари ги знаат придобивките од одгледувањето лековити, украсни и зачински растенија во близина на пиперки. Се претпочитаат босилек, невен, петунии, коријандер, магдонос, власец, камилица, оригано, мајчина душица, коприва, глуварче.
Босилекот со својот мирис ги отфрла трипсите, но и комарците и мувите. Кога е до лути пиперки, тоа влијае на вкусот и аромата на плодот, бидејќи тие стануваат поинтензивни. Коријандерот привлекува корисни инсекти, како што се бубамарите и штити од вошки. Невенот штити од нематоди на коренот, привлекува опрашувачи.
Од зеленчук се садат ротквици, спанаќ, зелена салата и моркови, кои ги одбиваат штетниците со својот мирис. Добро растат во стаклена градина до домати и модри патлиџани. Разликата е во тоа што доматите бараат почесто проветрување, така што внимавајте на растојанието, обезбедете им доволно наводнување и прихрана.
За сите видови треба да се внимава на меѓусебното растојание. Премногу густата култура лошо ќе влијае на пиперките, ќе го намали приносот, ќе создаде услови за појава на болести и напади од штетници.
Лош избор, слаб принос
Грешките во изборот на соседите можат драстично да го намалат приносот и да создадат проблеми. Некои видови ќе се натпреваруваат со пиперките за простор, вода и храна, додека други се посилни и ги црпат потребните состојки за себе. На прво место е анасонот, кој може целосно да ги задуши младите растенија, а во земјата испушта материи кои имаат неповолно дејство.
Копарот, мешунките, тиквите и тиквичките можат да бидат проблем кога се премногу блиску еден до друг.
Внимание! Не засадувајте лути и слатки пиперки во близина, бидејќи тие меѓусебно се опрашуваат, пишува Агроклуб.
СЦЗРР
