Апел за заштита на овошките од ниски темеператури. Стручните лица препорачуваат прскање со анти фрост препарати за зголемување на отпорноста на овошките.
После топлото време со високи температури настапи бран со ниски температури. Од Управата за хидрометеоролошки работи најавија ниски температури под нулата. Ваквите температури може негативно да се одразат кај овошките. Последици може да настанат особено кај оние овошки каде вегетацијата и раздвижувањето на соковите во растението започнале.
Еве какви температури се најавуваат за утре 29 и 30 март:
Минималните температури на 29 март ќе изнесуваат -5 степени во Крива Паланка, -4 во Ресен и Битола, -3 во Прилеп и Тетово, – 2 во Скопје, Струмица и Кочани, -1 во Демир Капија и Штип, додека 0 степени ќе биде минималната температура во Кавадарци. За 30 март пак минималната температура ќе изнесува -4 степени во Крива Паланка, – 3 во Битола, -2 степени во Струмица, Ресен и Тетово, а -1 во Скопје и Прилеп.
Министерството за земјоделство, шумарство и водостопанство апелира до земјоделците навремено да преземат мерки за заштита на овошните насади од измрзнување.
Според стручните лица постојат повеќе начини за заштита, но во моментов најдобро е да се направи прскање на дозволени средства за зголемување на отпорноста кај овошките. Станува збор за анти фрост препарати на база на храна и хормони.
Ниските температури стресно ќе влијаат на овошките. Земјоделците треба да оценат што ќе преземат за заштита , во зависност од фазата на развој во која се наоѓаат овошките. Најдобро е да се консултираат со стручно лице заштитар.
СЦЗРР
