Компост е вид на ѓубриво кое доколку сами го направите може да имате двојна корист. Ќе заштедите пари а со неговата употреба може да постигнете и добри резултати. Сега е периодот кога има многу органски отпад . Со мала организација и труд може тој отпад да го претворите во ѓубриво кое може да има повеќекратна примена. Прочитајте како се прави компост?
Компостирај
Компост е темно ѓубриво кое се добива од разни видови органски отпад. Овие материи се разложуваат и создаваат органски хумус кој може да се користи во нивите и градините. Со компостирањето се овозможува да се врати органскиот материјал во почвата од каде што потекнува, по истиот тек како што се создава во природата.
Зошто треба да се прави компост?
- Органскиот отпад сочинува повеќе од 50% од вкупниот отпад;
- Отпадот ослбодува преку 30% од метанот, кој е 23 пати појак стакленички гас од СО2;
- Компостот е исклучително важен за здрава и плодна почва;
- Ја намалува ерозијата бидејќи загубите на површинскиот слој земја се и до 10% годишно;
- Компостот овозможува задржување на водата во почвата и помалку наводнување;
- Компостот спречува појава на болести и плевел;
- Создава ѓубриво.
Што се компостира?
- За компост се употребува сув материјал богат со јаглерод, хартија и картон, суви листови, леб, ориз, тестенини, пилевина од дрво.
- Зелен материјал богат со азот овошје и зеленчук, зелени листови и растенија, трева, гранчиња итн.
Што не се компостира?
- Во компостот не се става измет од миленици, плевел што создал семе,болни растенија, месо, риби и коски, масло, млечни производи, пилевина од хемиски третирано дрво.
Како се подготвува материјал за компостирање?
- Направи контењер за компост од дрвени столбови и жичана мрежа,
- Постави го контењерот на сончева и издигната површина, и раскопај ја почвата за да дојдат инсекти и црви,
- На дното направи дебел слој од суви листови или исецкана хартија,
- Додај слој зелен материјал и распореди го,
- Покриј го со слој сув материјал кој спречува собирање н муви и мушички. По желба може и слој земја,
- Наизменично реди сув и влажен материјал додека да го наполнеш контењерот,
- Содржината на полниот контењер измешај ја со вила или гребло.
Мешај го купот на секои две недели. Материјалот може да се загрее и да спласне.
По 3-4 промешувања компостот е готов. Треба да биде растресит, влажен, темен, и да мириса на почва. Остави го компостот да одлежи два месеца пред да го употребиш.
Напомена:
Избалансирај го компостот, ако е многу сув, споро ќе се разгради, ако е многу влажен, ќе замириса и ќе протече. Целта е да имаш главно иста количина/тежина на сув и влажен материјал.
СЦЗРР
